05 October 2017

പൊന്നുമ്മ

പാദ പത്മങ്ങളില്‍ സ്വര്‍ഗം ഒളിപ്പിച്ച്‌
സംസം പോല്‍ തീര്‍ത്ഥം തന്‍ മാറില്‍ നിറച്ചിട്ട്‌
പാലൊളി പാലാഴി ചുണ്ടിലൊഴുക്കീട്ട്‌
തസ്ബീഹ്‌ കൊത്തിക്കൊറിക്കുമെന്‍ പൊന്നുമ്മ

അജ്ഞത തന്‍ മരുഭൂമിയില്‍ വിജ്ഞാന
ഗോപുരമെക്ക പടുത്ത മാഹമ്മദിന്‍
ഗാഥകള്‍ പാടിത്തരുമെന്റെ മാതാവിന്‍
കണ്ണിലെ കൃഷ്ണ ശിലയില്‍  മുത്തമിട്ടു ഞാന്‍

അവരെന്നോടോതിയ സ്വര്‍ഗ കഥകളാല്‍
മണ്ണിലെ സ്വപ്ന ലോകങ്ങള്‍ മറന്നു ഞാന്‍
അവരൂട്ടിയതേന്‍ തുള്ളി തീര്‍ത്ഥമാണിന്നുമെന്‍
ഉയിരും ഉശിരുമെന്‍ ജീവിതസ്സരണിയില്‍.



1927 ല്‍ ജനനം 05.10.2017 മരണം

25 June 2017

ഖബറടക്കം ചെയ്യാനാകാത്ത ഓര്‍മ്മകള്‍

കരഞ്ഞ്‌ കലങ്ങിയ മാനം നോക്കി പെരുന്നാള്‍ സുദിന ഒരുക്കങ്ങള്‍ തുടങ്ങിയപ്പോള്‍ ഓര്‍മ്മകളില്‍ ഒരിടി നാദം.ഒപ്പം കോരിച്ചൊരിയുന്ന പേമാരിയും.2003 ലെ ഇരുള്‍ മുറ്റിയ പ്രഭാതവും അന്നേ ദിവസത്തെ കണ്ണീര്‍വാര്‍‌ത്ത സായാഹ്നവും മനസ്സില്‍ തെളിയുന്നു.അബ്‌സാര്‍ എന്ന പതിമൂന്നുകാരന്‍ ! വിട പടറയാന്‍ നാഴികകള്‍ മാത്രം ബാക്കിയിരിക്കേ സ്‌ക്കൂള്‍ അസംബ്‌ളിയില്‍ തന്റെ ഊഴം ഹൃദയാവര്‍‌ജ്ജകമായി അബ്‌സാര്‍ ഉപയോഗപ്പെടുത്തിയിരുന്നു.അബ്‌സാറിന്റെ ഖബറിടത്തില്‍ നിന്നു കൊണ്ട്‌ പ്രതിഭയുടെ വാക്‌ധോരണിയുടെ ആഴവും പരപ്പും ഒരു ചിത്രീകരണത്തിലെന്ന പോലെ ഓര്‍ത്തെടുക്കുന്നു.അതെ ഖബറടക്കം ചെയ്യാനാകാത്ത ഓര്‍മ്മകള്‍...

തുരുമ്പെടുത്ത ശ്‌മശാനവാതില്‍ മെല്ലെ തള്ളിത്തുറന്നു.
'നിങ്ങള്‍ക്ക്‌ സമാധാനം അടുത്ത നാളില്‍ എന്റെ ഊഴം'
കൊച്ചുപ്രായത്തില്‍ പഠിച്ച വാചകം ഉരുവിട്ടു.
വെണ്ണക്കല്‍ ഫലകത്തില്‍ അവന്റെ പൂര്‍ണ്ണ നാമം
അഥവ പേരിന്റെ വാല്‍‌ കഷ്‌ണമായി എന്റെ പേരും
കണ്ണുകള്‍ തറച്ചു നിന്നത് അവിടെയാണ്‌.
ഞാനാണോ ഈ കല്ലറക്കകത്ത്‌
ശരീരത്തില്‍ മണ്ണുരയുന്നു
കൈകാലുകളില്‍ പുഴുക്കളിഴയുന്നു
കണ്ണുകള്‍ തുറക്കാനാകുന്നില്ല
ചുണ്ടുകള്‍ ചലിക്കുന്നില്ല
ബാപ്പാ...
കൊച്ചുമോന്‍ കുലുക്കി വിളിച്ചു
ഉറക്കില്‍ നിന്നെന്നവണ്ണം ഞെട്ടിയുണര്‍ന്നു
ജീവനൊടുങ്ങും മുമ്പെ ഖബറടക്കം ചെയ്യപ്പെട്ടവന്‍
ഞാന്‍
അതെ
ദേഹം മണ്ണോട്‌ ചേരുന്നതും
ദേഹി വിണ്ണിലേക്കുയരുന്നതും
രുചിച്ചു
ആസ്വദിച്ചു.
അങ്ങകലെ ഏഴാനാകാശത്തിനുമപ്പുറം
ഫിര്‍ദൌസെന്ന പൂങ്കാവനത്തില്‍
എത്തിനോക്കി
മനസ്സില്‍ താലോലിച്ചിരുന്ന
സ്വര്‍ഗലോകത്ത്‌ മാലാഖമാരോടൊത്ത്‌
ഉല്ലസിക്കുകയാണാ ദാര്‍ശനികന്‍ (അബ്‌സാര്‍ )
എന്നെ കളീകൂട്ടൂലലേ...?
പിണക്കം പറഞ്ഞ്‌ തിരിച്ച്‌ പോന്നു
ഇന്ന്‌ ഞാന്‍
ആ സ്വപ്‌നലോകത്താണ്‌.
സഹപാഠികളേയും അധ്യാപകരേയും
സാക്ഷി നിര്‍ത്തി
അവസാന പ്രഭാതത്തില്‍
നീ ആണയിട്ട വാക്കുകളുടെ
പടഹധ്വനിയും
പ്രതിധ്വനിയും
എന്റെ ഉറക്കം കെടുത്തുന്നു.
.....
ഉത്തര ധ്രുവത്തിലുള്ളവന്റെ വേദന
ദക്ഷിണ ധ്രുവത്തിലുള്ളവന്‌
അനുഭവേദ്യമാകുന്ന നാള്‍ വിദൂരമല്ല
നാം മനുഷ്യര്‍ ഒരേ മാതാപിതാക്കളുടെ മക്കളാണെന്ന ബോധം
ബോധ്യമാക്കിയെങ്കില്‍
ഇതായിരുന്നുവല്ലൊ
നിന്റെ ഭാഷണത്തിന്റെ സത്ത..
പേരിന്റെ പൊരുളറിഞ്ഞ കുട്ടീ..
നിന്റെ സ്വപ്‌നം പൂവണിയാന്‍
ധ്രുവങ്ങളോളം ദൂരം ഇനിയും
താണ്ടേണ്ടി വരും.
നിന്റെ വേപഥു തിരിച്ചറിയുന്ന ഒരു പച്ചമനുഷ്യനെ കാണാന്‍
ഭൂതക്കണ്ണട വേണ്ടി വരും.
....
രക്തബന്ധങ്ങള്‍ തിരിച്ചറിയപ്പെടാത്തകാലം
കഴുകനും മാടപ്രാവിനും ഒരേ ശിശ്രൂഷ ലഭ്യമാകുന്ന കാലം
ഈ ഭൂമികയില്‍ നിന്നുകൊണ്ടും
പ്രതീക്ഷയുടെ
സ്വപ്‌നങ്ങള്‍ നെയ്‌തെടുത്തവന്‍ നീ
....
ഒരുതുള്ളി വെള്ളത്തിന്‌ വേണ്ടി തൊണ്ടകീറുന്ന പൈതങ്ങളുടെ
കാതടപ്പിച്ച്‌കൊണ്ട്‌
ഗുഡ്‌സ്‌ വണ്ടികള്‍ ചൂളം വിളിച്ച്‌ പായുന്നു
നിറയെ പാലും പഴവും വഹിച്ച്‌ കൊണ്ട്‌
ഇതു്‌ ദൈവങ്ങള്‍ക്കുള്ളതാണ്‌.
....
വിശുദ്ധ വചനങ്ങളില്‍
പരലോക വിചാരണയുടെ വാങ്‌മയ ചിത്രം:
നീയെന്നെ ഊട്ടിയില്ല
കുടിപ്പിച്ചില്ല
ഉടുപ്പിച്ചില്ല
സന്ദര്‍ശിച്ചില്ല...
'സര്‍വ്വലോക പരിപാലകന്‍
നീയെത്ര പരിശുദ്ധന്‍
അടിയനെങ്ങനെ നിന്നെ ശിശ്രൂഷിക്കാന്‍..'
'സഹജീവികളെ സേവിച്ചിരുരുന്നെങ്കില്‍ .
അതത്രെ ദൈവസേവ.'
....
ശുദ്ധപാഠങ്ങളോതി
അധരവ്യായാമം ചെയ്‌ത് സംതൃപ്‌തിയടയുന്ന
ലോകത്തോട്‌
'നീ നിന്നെയറിഞ്ഞുവെങ്കില്‍ ദൈവത്തെ അറിഞ്ഞേനെ
സംസ്‌കൃത ചിത്തനായ്‌ തീര്‍ന്നേനേ..'
ചങ്കു പൊട്ടുമാറുച്ചത്തില്‍
കൂകിപ്പാടിയ പൂങ്കുയിലേ
ഈ പാട്ടിന്റെ പ്രതിധ്വനി
എന്റെ ഉറക്കം കെടുത്തുന്നു.
*************************
അബ്‌സാറിന്റെ ഖബറിടം സന്ദര്‍ശിച്ചപ്പോള്‍ മനസ്സില്‍ മിന്നിമറഞ്ഞ ചില വിചാര വികാരങ്ങള്‍.
പിറന്നത്‌ 1990 ജനുവരി 5,മറഞ്ഞത്‌ 2003 ജൂണ്‍ 26 .

05 May 2017

ജയ ജയ ഗീതം

ജയ ജയ ഗീതം
................
പരിശുദ്ധിയുടെ തൂവെള്ളയില്‍
രക്ത സാക്ഷ്യത്തിന്റെ
ചുടു ചോര നിറം ചാര്‍ത്തിയ
പതാകയുടെ
തണലില്‍
ജലകണം എന്നര്‍ഥമുള്ളൊരു
രാജ്യം .

ജനപഥങ്ങളുടെ
പാദമുദ്രകള്‍
നെഞ്ചിലേറ്റി
പലതുള്ളി പെരുവെള്ളം
സാര്‍ഥകമാക്കിയ
സാരഥ്യം .

ഈ തുള്ളിയിലൊരു
ജലകണമായലിഞ്ഞു
ചേര്‍ന്ന നിര്‍വൃതിയില്‍
പാടുന്നു
ജയ ജയ
ജയ ഗീതം ..
..........................
അബ്‌ദുല്‍ അസീസ്‌ മഞ്ഞിയില്‍

24 April 2017

നീ വിളിച്ചു












വിശ്വാസിയുടെ ആകാശാരോഹണമത്രെ നമസ്‌കാരം.
ഒരു കവി ഭാവന....

******
നീ വിളിച്ചു
വിണ്ണിലേയ്‌ക്ക്‌
വിജയത്തിലേയ്‌ക്ക്‌
നിന്റെ സാമിപ്യം ഞാന്‍ കൊതിച്ചു
തീരം കൊതിക്കുന്ന തിരപോലെ
മധുമലര്‍ തേടുന്ന മധുപനെപ്പോലെ..

നെറ്റിത്തടം പതിഞ്ഞ
സുജൂദിന്റെ കലയിലൂടെ
പ്രയാണം തുടങ്ങി..

മദീന കണ്ടു
സീനാ പര്‍വ്വതം കണ്ടു
ഖുദ്‌സ്‌ കണ്ടു
ഏഴാകാശങ്ങളും പിന്നിട്ട്‌
സിദറത്തുല്‍ മുന്തഹയുടെ കവാടത്തില്‍
മുസ്വല്ല മുട്ട്‌ കുത്തി നിന്നു...
സിംഹാസനത്തിലേയ്‌ക്കുള്ള വഴി തേടി
മനസ്സ്‌ തുടികൊട്ടി!!

അനുരാഗത്തിന്റെ തീഷ്‌ണതയില്‍
‍ഞാനൊരു
നെയ്‌തിരിയായി!!

വെള്ളി വെളിച്ചത്തില്‍
മുങ്ങി നിവര്‍ന്ന സ്വര്‍ഗം
അവര്‍ണനീയമായ താഴ്‌വര
പ്രശാന്ത ഗോപുരം
പ്രകാശ നിര്‍ത്ധരി..

സംഗീതവും സുഗന്ധവും
പേറി വന്ന തെന്നലലകള്‍
പൂ പറിക്കുന്ന ചേലില്‍
‍ഈ തിരിനാളവും പറിച്ച്‌
പറന്ന്‌ പോയൊളിച്ചെങ്കിലാ
പ്രകാശ ഗംഗയിലെന്നാശിച്ച്‌
എല്ലാം മറന്ന്‌ എല്ലാം മറന്ന്‌
കാത്ത്‌ നിന്നേന്‍ ...

പ്രബോധനം പ്രസിദ്ധീകരിച്ചത്‌

01 April 2017

ഇനിയുമെത്രെ ദൂരം .........

ദുര്‍ നടപടിക്കാരിയുടെ ക്ഷേമാശ്വൈര്യങ്ങളില്‍
പ്രവാചക പ്രഭുവിനെന്തു കാര്യമെന്നത്രെ
സഹചരുടെ ആത്മഗതം ?

അന്ത്യാഭിലാഷത്തിന്റെ മറവില്‍
ഹുര്‍മുസാന്റെ തന്ത്രത്തില്‍
ധര്‍മ്മിഷ്‌ടനായ
ഖലീഫ കബളിക്കപ്പെട്ടെന്നത്രെ
അനുചരന്മാര്‍ സന്ദേഹിച്ചത്‌ ?

വിശ്വാസിയുടെ വാള്‍മുനയില്‍
നിന്നു രക്ഷ നേടാന്‍ കാര്‍ക്കിച്ചൊരു തുപ്പു മതി പോലും !

എനിക്കെന്റെ നാഥനുണ്ടെന്ന
പ്രത്യുത്തരം കൊണ്ട്‌
ശത്രുവിനെ നിരായുധനാക്കാന്‍
ഇനിയുമെത്രെ ദൂരം .........

********************
നിത്യവും പ്രവാചകനെ ശല്യം ചെയ്‌തിരുന്ന ജൂത സ്‌ത്രീ രോഗ ശയ്യയിലാണെന്നറിഞ്ഞപ്പോള്‍ :-റസൂല്‍ അവരെ സന്ദര്‍ശിച്ചു.പ്രവാകന്റെ അനന്യ സാധാരണമായ കാരുണ്യത്തിന്റെ നിറവില്‍ ഈ സ്‌ത്രീ മാര്‍ഗ ദര്‍ശനം ചെയ്യപ്പെട്ടു.

ശത്രു സൈന്യത്തിന്റെ പടനായകനായിരുന്ന ഹുര്‍മുസാന്‍ പിടിക്കപ്പെട്ടതിനു ശേഷം ശിക്ഷ നടപ്പാക്കപ്പെടുന്നതിന്റെ മുമ്പ്‌ അന്ത്യാഭിലാഷമായി ദാഹജലം ആവശ്യപ്പെടുകയും കൊണ്ടു വരപ്പെട്ട വെള്ളം തറയിലൊഴിച്ചുകളയുകയും ചെയ്‌തു.ദാഹം തീര്‍‌ത്തതിനു ശേഷം ശിക്ഷ നടപ്പാക്കുകയുള്ളൂ എന്ന കുറ്റവാളിയോടുള്ള വാഗ്ദത്തം പാലിക്കാനുള്ള ഖലീഫയുടെ ധര്‍മ്മനിഷ്‌ടയുടെ പ്രഭാവത്തില്‍ ഹുര്‍മുസാന്‍ യഥാര്‍ഥ മാര്‍ഗത്തിലേയ്‌ക്ക്‌ ആകര്‍ഷിക്കപ്പെട്ടു.

മഹാനായ അലിയുടെ മുഖത്തേയ്‌ക്ക്‌ എതിരാളി കാര്‍ക്കിച്ചു തുപ്പിയപ്പോള്‍ അലി (റ) തന്റെ ആയുധം വലിച്ചെറിഞ്ഞു.തികച്ചും വ്യക്തി വിദ്വേഷത്താലായിരിക്കരുത്‌ തന്റെ എതിരാളി കീഴ്‌പെടുത്തപ്പെടേണ്ടതെന്നായിരുന്നു തന്റെ അനുചരന്മാരോട്‌ മഹാനവര്‍കള്‍ നല്‍കിയ വിശദീകരണം.

വൃക്ഷ തണലില്‍ പ്രവാച പ്രഭു വിശ്രമിക്കേ ഒരാള്‍ പ്രവാചകന്റെ ആയുധം എടുത്തുകൊണ്ട്‌ ചോദിച്ചു 'താങ്കളെ ആര്‍ രക്ഷിക്കും ? നിമിഷാര്‍ധം കൊണ്ട്‌ മറുപടി അല്ലാഹു.പ്രത്യത്തരം കേട്ടുടന്‍ ഉടവാള്‍ നിലത്തു വീഴുന്നു.
അസീസ്‌ മഞ്ഞിയില്‍

09 February 2017

നീര്‍ മുത്തുകള്‍

പൂന്തെന്നലിലുലയുന്ന
പൂവിന്‍ പിടച്ചലില്‍
പ്രേമാര്‍‌ദ്രമാം രാഗ വീചിയുണ്ട്‌.

സ്വര രാഗ വീചിയിലലിയും
സുഗന്ധത്തില്‍
മധുരമാം തളരിത മന്ത്രമുണ്ട്‌.

മധു മന്ത്ര മാന്ത്രിക
ജതി തേടിയെത്തിയ
മധുപന്‍ നുകര്‍‌ -
ന്നാനന്ദിച്ചിടുമ്പോള്‍

ആനന്ദ സം‌ഗീത
സുധയിലലിഞ്ഞ
മലരിതളുകളില്‍
മിന്നുന്നു
നീര്‍ മുത്തുകള്‍..

18 December 2016

കയ്യിലെരിയുന്നുണ്ട്‌ കൈത്തിരി

2016 ഡിസം‌ബറില്‍.ഉലഞ്ഞുടഞ്ഞ പൂക്കളും പൂങ്കാവനവും.സങ്കടപ്പെരുമഴയുടെ സംഗീതം കാതോര്‍‌ത്ത്‌ മരക്കൊമ്പിലമര്‍ന്നിരിക്കുന്ന പൈങ്കിളികളും.വിങ്ങിപ്പൊട്ടുന്ന സായാഹ്നം.സുധീരനായ കൗമാരക്കാരന്‍ മുഹമ്മദ്‌ ഫാസില്‍ വിടരും മുമ്പേ അടര്‍ന്നു വീണ നിമിഷങ്ങള്‍.

2003 ജൂണ്‍ മാസത്തില്‍.കാറ്റും കോളും നിറഞ്ഞ പ്രകൃതം.ചില്ലകളൊടിഞ്ഞ വൃക്ഷ ശിഖിരങ്ങള്‍.കരഞ്ഞു കലങ്ങിയ ചക്രവാളം.കണ്ണീരൊലിപ്പിച്ച സായാഹ്നം.ബാല പ്രതിഭ അബ്‌സ്വാര്‍ കരുണാ വാരിധിയില്‍ ലയിച്ചമര്‍‌ന്ന നിമിഷങ്ങള്‍.

ഒരു മഞ്ഞുകാലത്തിന്റെയും മഴക്കാലത്തിന്റെയും ഇടയില്‍ കുറിക്കപ്പെട്ട വരികള്‍.

കയ്യിലെരിയുന്നുണ്ട്‌ കൈത്തിരി
ഉള്ളിലുണ്ട് നെയ്‌ത്തിരി
പാട്ടുമൂളും തെന്നലില്‍ തിര
തല്ലിടുന്ന കിങ്ങിണി
കേട്ട് പേടിക്കുന്ന ദീപ
നാളമെന്തൊരു സുന്ദരി..


പൂവറുക്കും  ചേലില്‍ കൈത്തിരി
നാളവും പറിച്ച്
തെന്നലോടിപ്പോയി ദീപ
നാളമൊളിപ്പിച്ച്...

എണ്ണ തീരും മുമ്പണഞ്ഞീ
മണ്‍ ചിരാതിന്‍ മാതിരി
അല്ലയോ ജീവന്റെ നാളം
കാറ്റിലുലയും നെയ്‌ത്തിരി..

മേഘമായൊരു നൂറു നാഴിക
എന്തിനു ജീവിക്കണം
മിന്നലായൊരു നിമിഷമെത്ര
മനോഹരമെന്നോര്‍‌ക്കണം ..

കത്തിയെരിയുകയല്ലോ വെട്ടം
പെയ്‌തിറങ്ങാന്‍ ചുറ്റിലും
കാറ്റിലാടിയുലഞ്ഞു നാളം
കണ്ണടക്കും നേരവും....