23 June 2018

ആരാമത്തിന്റെ രഹസ്യം ....

മറക്കുകയാണ്‌....
മലര്‍ വിടര്‍ത്തിയതും
മധു ചുരത്തിയതും
മണം പരത്തിയതും
പ്രസാദിപ്പിച്ചതും....

മറക്കുകയാണ്‌....
കുസൃതി കിടാങ്ങള്‍
ചില്ലയില്‍ തല്ലിനോവിപ്പിച്ചതും....
2
ഓര്‍ക്കുകയാണ്‌....
തണലും
തണ്ണീര്‍തടവും
തലോടലും…..
ഓര്‍ക്കുകയാണ്‌....
മുള്‍ മുനകളേറ്റ്‌ മുറിവേറ്റവരേയും….
...............................

മറ്റുള്ളവര്‍ക്ക്‌ നല്‍കിയത്‌ മറക്കണം .
മറ്റുള്ളവര്‍ വേദനിപ്പിച്ചതും മറക്കണം

മറ്റുള്ളവരില്‍ നിന്നും ലഭിച്ചത്‌ ഓര്‍ക്കണം
മറ്റുള്ളവരെ വേദനിപ്പിച്ചതും ഓര്‍ക്കണം...  
എന്ന പ്രവാചക പാഠത്തെ അധികരിച്ചെഴുതിയ കവിത.

പ്രബോധനം പ്രസിദ്ധീകരിച്ചത്‌.

19 June 2018

എന്റെ മാണിക്യച്ചെപ്പ്‌


കൂരിരുട്ടില്‍ തപ്പിത്തടയുന്ന നേരത്ത്
കണ്ടുകിട്ടി മാണിക്യ
ക്കല്ലെന്റെ ചെപ്പില്‍ നിന്നും
എന്തൊരാവേശമുള്ളില്‍ പൂത്തുലയുന്നു
ഹൃത്ത
മെത്രയോ വട്ടം ദൈവ-
സ്‌മരണ പുതുക്കുന്നു.

അറിഞ്ഞില്ലെന്‍ കയ്യിലെ
ചെപ്പിനകത്തായിത്ര
അത്ഭുതമേറും മുത്ത്‌
മണിയായിരുന്നെന്ന്‌
പറഞ്ഞില്ലാരും ചെപ്പി
നകത്തെ കഥയൊന്നും
അറിഞ്ഞതെല്ലാം
ചെപ്പ്‌
സൂക്ഷിപ്പിന്‍ വിധിമാത്രം

എത്രവട്ടമിരുട്ടില്‍
വീണു ഞാന്‍ നിലം പൊത്തി
എത്ര വട്ടം വഴിയറിയാതെ ഗതിമുട്ടി

അന്നൊക്കെ മിന്നാ മിനുങ്ങിന്റെ
വെട്ടങ്ങളായിരുന്നാശ്രയമെന്നോര്‍ത്തിട്ടിന്ന്
നാണിക്കുന്നു ഞാന്‍ ............

പ്രബോധനം പ്രസിദ്ധീകരിച്ചത്‌

05 June 2018

തേനീച്ചകള്‍ 

എത്ര നിര്‍ദയമായാണ്‌ 
വൃക്ഷ ശിഖിരവും കൂടും 
തീ കൊളുത്തപ്പെട്ടത്‌.
റാണിയെ ഒറ്റപ്പെടുത്തി
പരിചാരകരേയും 
പാറാവുകാരേയും 
പ്രതിജ്ഞാ ബദ്ധരായ
സേവകരേയും 
പന്തം കൊളുത്തി തുരത്തി.
മധു ശേഖരങ്ങള്‍  
വേട്ടക്കാര്‍ പങ്കു വച്ചു..

കോപ്പകള്‍ കൂട്ടിമുട്ടി
കുടിച്ചുല്ലസിക്കുന്ന
സംഗീത സദസ്സുകള്‍ .. 

എത്ര നെറികേടാണെങ്കിലും 
കാഴ്‌ചകള്‍
സര്‍വ്വ സാധാരണമാകുമ്പോള്‍ 
സമരസപ്പെടാന്‍ 
നിര്‍ബന്ധിതമാകുന്ന
ലോക ക്രമം... 

ഇരകള്‍ വീണ്ടും പുതിയ 
താഴ്‌വരകള്‍ തേടി
പറന്നുയരുകയാണ്‌ ...
......................

29 May 2018

ഇനിയുമെത്രെ ദൂരം .........

ദുര്‍ നടപടിക്കാരിയുടെ ക്ഷേമാശ്വൈര്യങ്ങളില്‍
പ്രവാചക പ്രഭുവിനെന്തു കാര്യമെന്നത്രെ
സഹചരുടെ ആത്മഗതം ?

അന്ത്യാഭിലാഷത്തിന്റെ മറവില്‍
ഹുര്‍മുസാന്റെ തന്ത്രത്തില്‍
ധര്‍മ്മിഷ്‌ടനായ
ഖലീഫ കബളിക്കപ്പെട്ടെന്നത്രെ
അനുചരന്മാര്‍ സന്ദേഹിച്ചത്‌ ?

വിശ്വാസിയുടെ വാള്‍മുനയില്‍
നിന്നു രക്ഷ നേടാന്‍ കാര്‍ക്കിച്ചൊരു തുപ്പു മതി പോലും !

എനിക്കെന്റെ നാഥനുണ്ടെന്ന
പ്രത്യുത്തരം കൊണ്ട്‌
ശത്രുവിനെ നിരായുധനാക്കാന്‍
ഇനിയുമെത്രെ ദൂരം .........

********************
നിത്യവും പ്രവാചകനെ ശല്യം ചെയ്‌തിരുന്ന ജൂത സ്‌ത്രീ രോഗ ശയ്യയിലാണെന്നറിഞ്ഞപ്പോള്‍ :-പ്രവാചകന്‍ അവരെ സന്ദര്‍ശിച്ചു.പ്രവാകന്റെ അനന്യ സാധാരണമായ കാരുണ്യത്തിന്റെ നിറവില്‍ ഈ സ്‌ത്രീ മാര്‍ഗ ദര്‍ശനം ചെയ്യപ്പെട്ടു.

ശത്രു സൈന്യത്തിന്റെ പടനായകനായിരുന്ന ഹുര്‍മുസാന്‍ പിടിക്കപ്പെട്ടതിനു ശേഷം ശിക്ഷ നടപ്പാക്കപ്പെടുന്നതിന്റെ മുമ്പ്‌ അന്ത്യാഭിലാഷമായി ദാഹജലം ആവശ്യപ്പെടുകയും കൊണ്ടു വരപ്പെട്ട വെള്ളം തറയിലൊഴിച്ചുകളയുകയും ചെയ്‌തു.ദാഹം തീര്‍‌ത്തതിനു ശേഷം ശിക്ഷ നടപ്പാക്കുകയുള്ളൂ എന്ന കുറ്റവാളിയോടുള്ള വാഗ്ദത്തം പാലിക്കാനുള്ള ഖലീഫയുടെ ധര്‍മ്മനിഷ്‌ടയുടെ പ്രഭാവത്തില്‍ ഹുര്‍മുസാന്‍ യഥാര്‍ഥ മാര്‍ഗത്തിലേയ്‌ക്ക്‌ ആകര്‍ഷിക്കപ്പെട്ടു.

മഹാനായ അലിയുടെ മുഖത്തേയ്‌ക്ക്‌ എതിരാളി കാര്‍ക്കിച്ചു തുപ്പിയപ്പോള്‍ മഹാനായ അലി (റ) തന്റെ ആയുധം വലിച്ചെറിഞ്ഞു.തികച്ചും വ്യക്തി വിദ്വേഷത്താലായിരിക്കരുത്‌  തന്റെ എതിരാളി  കീഴ്‌പെടുത്തപ്പെടേണ്ടതെന്നായിരുന്നു തന്റെ അനുചരന്മാരോട്‌ മഹാനവര്‍കള്‍ നല്‍കിയ വിശദീകരണം.

വൃക്ഷ തണലില്‍ പ്രവാച പ്രഭു വിശ്രമിക്കേ ഒരാള്‍ പ്രവാചകന്റെ ആയുധം എടുത്തുകൊണ്ട്‌ ചോദിച്ചു 'താങ്കളെ ആര്‍ രക്ഷിക്കും ? നിമിഷാര്‍ധം കൊണ്ട്‌ മറുപടി അല്ലാഹു.പ്രത്യത്തരം കേട്ടുടന്‍ ഉടവാള്‍ നിലത്തു വീഴുന്നു.

അസീസ്‌ മഞ്ഞിയില്‍

15 April 2018

കാവി സന്ധ്യയെ വിളറി പിടിപ്പിക്കുന്ന കാറ്റ്‌

സ്വഛമായി നിലാവു പരത്തിയിരുന്ന
പൂര്‍‌ണ്ണ ചന്ദ്രനില്‍ കരി നിറം നിഴലിട്ടു.
കൃഷ്‌ണ പക്ഷത്തിനു ശേഷം
കാര്‍മേഘ പാളികളാലാവൃതമായി
തിങ്കള്‍ അവ്യക്തമായി കാണപ്പെട്ടു.
നറും നിലാവിന്റെ ശീതള ഛായയില്‍
സ്‌തുതി ഗീതമാലപിച്ചിരുന്നവരുടെ
ചങ്കു പൊട്ടി
അവരുടെ ദീന രോധനം
മേഘ ഗര്‍‌ജ്ജനം കവര്‍‌ന്നു.
അവരുടെ കണ്ണീര്‍ ചാലില്‍
ഗോപകുമാരന്മാര്‍
ഗോക്കളെ കുളിപ്പിച്ചു.
അവരുടെ അസ്ഥികള്‍കൊണ്ട്‌
ചക്രവും ഗദയും താമരയുമുണ്ടാക്കി.
അവരുടെ കരളുകള്‍ പറിച്ചെടുത്ത്
സുദര്‍‌ശന ചക്രമുണ്ടാക്കി
അവരുടെ രക്തം
തേരാളികളെ കുടിപ്പിച്ച്‌
മദോന്മത്തരാക്കി
അവരുടെ ചില്ലുടഞ്ഞ കിനാക്കള്‍ കൊണ്ട്‌
ശം‌ഖു മാലയും
രുദ്രാക്ഷ മാലയും
ഉണ്ടാക്കി
ഹിമാലയം ഉരുകി ഒലിച്ചു.
ഗം‌ഗയും യമുനയും
കര കവിഞ്ഞിഒഴുകി
ഇനി വീശാനിരിക്കുന്നു
മരുക്കാറ്റ്‌
കാവി സന്ധ്യയെ
വിളറി പിടിപ്പിക്കുന്ന കാറ്റ്‌
വരാനിരിക്കുന്നു.
പുതിയ പ്രഭാതവും പ്രദോഷവും
പൂര്‍‌ണ്ണ നിലാവുള്ള രാത്രിയും.

1992 ല്‍ ഇന്ത്യന്‍ ജനാധിപത്യത്തിന്റെ മരണ മണി മുഴങ്ങി തുടങ്ങിയപ്പോള്‍  കുറിച്ചത്‌.രണ്ടര പതിറ്റാണ്ട്‌ മുമ്പ്‌ പ്രതീക്ഷ കൈവിടാതെ കുറിച്ചു വെച്ച വരികള്‍ ഒരിക്കല്‍ കൂടെ.

14 April 2018

ഞാന്‍ ..

ആസിഫാ....
ഞാന്‍ ..
കരയുന്നില്ല
കരഞ്ഞാല്‍
പ്രളയമുണ്ടാകുമത്രെ
നെടുവീര്‍പ്പയക്കുന്നില്ല
നെടുവീര്‍പ്പ്‌
കൊടുങ്കാറ്റാകുമത്രെ
മൗനിയാകാനും വയ്യ
മൗനം
വാചാലമത്രെ

02 March 2018

തെന്നിലാപുരം

ഒരു സൂന മുണര്‍‌ന്നു
വിടര്‍‌ന്നു
മധുവും മലര്‍ മണവും
പകര്‍‌ന്നൊടുവില്‍
മലര്‍ വാടിയില്‍
വീണുടഞ്ഞൊരു
വര്‍‌ണ്ണ ശലഭത്തിന്‍
ചിറകു പോലെ..

ഇടയന്റെ വടിയായ്‌
പതിതന്റെ തണലായ്‌
വ്രണിതന്റെ മോഹമായ്
ബധിരന്റെ കാതായ്‌
കുരുടന്റെ കണ്ണായ്‌
മൂകരുടെ ശബ്‌ദ തരം‌ഗമായി..

നിരാലം‌ബരുടെ ആശയായ്‌
നിറ മിഴികളില്‍ വര്‍‌ണ്ണമായ്‌
നെടുവിര്‍പ്പുകളിലെന്നുമൊരു
സാന്ത്വന സ്‌പര്‍‌ശമായ്‌
സഹജരുടെ തപ്പും തുടിയുമായി
വിപ്‌ളവ ഗാഥയുടെ സ്വര
വീചിയായ്
ഗാനമായ്‌
രാഗമായ്‌
താളമായ്‌
സം‌ഗീതം പെയ്യുന്ന
തെന്നലലകള്‍
മൂളാതെ ....
നിശബ്‌ദമായി..

വഴിമുട്ടി ഗതി മുട്ടി
ഭയ ചകിതരായലയും
പുറം പോക്ക്‌ മക്കളുടെ
തിറയും തിരിയും അണഞ്ഞു പോയി...

കതിരണിയും നാടിന്റെ
നാട്ടുപാതകളിലായ്‌
പൂത്തുലഞ്ഞാടി
നിന്നൊരു
പൂവാടി
ഇന്നിതാ
നമ്ര ശിരസ്‌കരായി...

പൂമാരി പെയ്‌തൊഴിഞ്ഞ
താഴ്‌വരകളില്‍
പൂന്തെന്നല്‍ പോയൊളിച്ച
തീരങ്ങളില്‍
പൂന്തേന്‍ നിലാവ്‌ വിരിച്ചൊരു
താഴ്‌വര കാര്‍‌മേഘം കൊണ്ട്‌
പുതച്ചു പോയി..