15 April 2018

കാവി സന്ധ്യയെ വിളറി പിടിപ്പിക്കുന്ന കാറ്റ്‌

സ്വഛമായി നിലാവു പരത്തിയിരുന്ന
പൂര്‍‌ണ്ണ ചന്ദ്രനില്‍ കരി നിറം നിഴലിട്ടു.
കൃഷ്‌ണ പക്ഷത്തിനു ശേഷം
കാര്‍മേഘ പാളികളാലാവൃതമായി
തിങ്കള്‍ അവ്യക്തമായി കാണപ്പെട്ടു.
നറും നിലാവിന്റെ ശീതള ഛായയില്‍
സ്‌തുതി ഗീതമാലപിച്ചിരുന്നവരുടെ
ചങ്കു പൊട്ടി
അവരുടെ ദീന രോധനം
മേഘ ഗര്‍‌ജ്ജനം കവര്‍‌ന്നു.
അവരുടെ കണ്ണീര്‍ ചാലില്‍
ഗോപകുമാരന്മാര്‍
ഗോക്കളെ കുളിപ്പിച്ചു.
അവരുടെ അസ്ഥികള്‍കൊണ്ട്‌
ചക്രവും ഗദയും താമരയുമുണ്ടാക്കി.
അവരുടെ കരളുകള്‍ പറിച്ചെടുത്ത്
സുദര്‍‌ശന ചക്രമുണ്ടാക്കി
അവരുടെ രക്തം
തേരാളികളെ കുടിപ്പിച്ച്‌
മദോന്മത്തരാക്കി
അവരുടെ ചില്ലുടഞ്ഞ കിനാക്കള്‍ കൊണ്ട്‌
ശം‌ഖു മാലയും
രുദ്രാക്ഷ മാലയും
ഉണ്ടാക്കി
ഹിമാലയം ഉരുകി ഒലിച്ചു.
ഗം‌ഗയും യമുനയും
കര കവിഞ്ഞിഒഴുകി
ഇനി വീശാനിരിക്കുന്നു
മരുക്കാറ്റ്‌
കാവി സന്ധ്യയെ
വിളറി പിടിപ്പിക്കുന്ന കാറ്റ്‌
വരാനിരിക്കുന്നു.
പുതിയ പ്രഭാതവും പ്രദോഷവും
പൂര്‍‌ണ്ണ നിലാവുള്ള രാത്രിയും.

1992 ല്‍ ഇന്ത്യന്‍ ജനാധിപത്യത്തിന്റെ മരണ മണി മുഴങ്ങി തുടങ്ങിയപ്പോള്‍  കുറിച്ചത്‌.രണ്ടര പതിറ്റാണ്ട്‌ മുമ്പ്‌ പ്രതീക്ഷ കൈവിടാതെ കുറിച്ചു വെച്ച വരികള്‍ ഒരിക്കല്‍ കൂടെ.

0 comments:

Post a Comment

Note: Only a member of this blog may post a comment.