02 March 2018

തെന്നിലാപുരം

ഒരു സൂന മുണര്‍‌ന്നു
വിടര്‍‌ന്നു
മധുവും മലര്‍ മണവും
പകര്‍‌ന്നൊടുവില്‍
മലര്‍ വാടിയില്‍
വീണുടഞ്ഞൊരു
വര്‍‌ണ്ണ ശലഭത്തിന്‍
ചിറകു പോലെ..

ഇടയന്റെ വടിയായ്‌
പതിതന്റെ തണലായ്‌
വ്രണിതന്റെ മോഹമായ്
ബധിരന്റെ കാതായ്‌
കുരുടന്റെ കണ്ണായ്‌
മൂകരുടെ ശബ്‌ദ തരം‌ഗമായി..

നിരാലം‌ബരുടെ ആശയായ്‌
നിറ മിഴികളില്‍ വര്‍‌ണ്ണമായ്‌
നെടുവിര്‍പ്പുകളിലെന്നുമൊരു
സാന്ത്വന സ്‌പര്‍‌ശമായ്‌
സഹജരുടെ തപ്പും തുടിയുമായി
വിപ്‌ളവ ഗാഥയുടെ സ്വര
വീചിയായ്
ഗാനമായ്‌
രാഗമായ്‌
താളമായ്‌
സം‌ഗീതം പെയ്യുന്ന
തെന്നലലകള്‍
മൂളാതെ ....
നിശബ്‌ദമായി..

വഴിമുട്ടി ഗതി മുട്ടി
ഭയ ചകിതരായലയും
പുറം പോക്ക്‌ മക്കളുടെ
തിറയും തിരിയും അണഞ്ഞു പോയി...

കതിരണിയും നാടിന്റെ
നാട്ടുപാതകളിലായ്‌
പൂത്തുലഞ്ഞാടി
നിന്നൊരു
പൂവാടി
ഇന്നിതാ
നമ്ര ശിരസ്‌കരായി...

പൂമാരി പെയ്‌തൊഴിഞ്ഞ
താഴ്‌വരകളില്‍
പൂന്തെന്നല്‍ പോയൊളിച്ച
തീരങ്ങളില്‍
പൂന്തേന്‍ നിലാവ്‌ വിരിച്ചൊരു
താഴ്‌വര കാര്‍‌മേഘം കൊണ്ട്‌
പുതച്ചു പോയി..

0 comments:

Post a Comment

Note: Only a member of this blog may post a comment.