26 January 2021

കൂട്ടിലടക്കപ്പെട്ട പക്ഷി

സ്നേഹത്തിന്റെ സാഹോദര്യത്തിന്റെ ദൂതുമായി പാറിപ്പറന്നിരുന്ന പക്ഷി ഇതാ കൂട്ടിലടക്കപ്പെട്ടിരിക്കുന്നു.മണ്ണിന്റെ ചൂരറഞ്ഞ്‌ വിണ്ണില്‍ ഉയര്‍‌ന്ന്‌ പറന്നിരുന്ന പക്ഷി.തടവിലടക്കപ്പെട്ടിരിക്കുന്നു.അനീതിയോടും അധാര്‍‌മ്മികതയോടും താതാത്മ്യം പ്രാപിക്കാന്‍ ശ്രമിക്കുന്നവര്‍ ആ ക്രൂര വിനോദത്തെ ന്യായീകരിക്കുന്നു.പാടിപ്പാടി പുകഴ്‌ത്തുകയും ചെയ്യുന്നു.ഇരുട്ടിനോടാണവര്‍‌ക്ക്‌ താല്‍‌പര്യം. വെളിച്ചത്തോടവര്‍‌ക്ക്‌ നീരസമത്രെ. കറുപ്പിന്റെ ശക്തികളാണവര്‍.

ആ കൊടും വഞ്ചനക്ക്‌ ആത്മാര്‍‌ഥമായി പോരടിച്ചു നില്‍‌ക്കുന്ന ഒരു വിഭാഗം ഉണ്ട്‌.നന്മയുടെ വക്താക്കള്‍.വെളിച്ചത്തെ ഇഷ്‌ടപ്പെടുന്നവര്‍ അം‌ഗ ബലം കൊണ്ട്‌ കുറവാണെങ്കിലും അവഗണിക്കാന്‍ കഴിയാത്ത ശക്തിയാണവര്‍. കൂരാ കൂരിരുട്ടത്തെ നുറുങു വെട്ടങ്ങളാണവര്‍.

ഇതിലൊക്കെ തങ്ങള്‍‌ക്കെന്തു കാര്യം എന്ന മട്ടില്‍ പ്രതികരിക്കാനറിയാത്ത മറ്റൊരു വിഭാഗം ഉണ്ട്‌.ഇരുട്ടും വെളിച്ചവും തിരിച്ചറിയാന്‍ കഴിയാത്തവര്‍.

ഇരുട്ടും വെളിച്ചവും എന്തു പറയുന്നു നമുക്ക്‌ ശ്രവിക്കാം. ഒടുവില്‍, തടവിലടക്കപ്പെട്ട പക്ഷിയുടെ ധീരമായ വായ്‌ത്താരിയും.തടവിലടക്കപ്പെട്ട പക്ഷി.

----------------

അരുതാത്തത്‌ കണ്ട്‌ ചിലക്കൊല്ല നീ പക്ഷീ

ഇരുള്‍ മുറ്റിയ തടവറയിലൊതുങ്ങി കഴിയുക

പറയൊല്ല മൂല്യവും മൂല്യ ശോഷണവും നീ

കതിരും പതിരും വേര്‍‌ത്തിരിക്കേണ്ട നീ പക്ഷീ


പറന്നുയരുകയായിരുന്നല്ലോ നീയേറെ

പരിതസ്ഥിതികളും മറന്നു കൊണ്ടേ ദൂരേ

ചക്രവാളം കാട്ടി കാട്ടി കൊതിപ്പിച്ച്‌

ചക്രം തിരിഞ്ഞു വീണിന്നു നിന്‍ വിരിമാറില്‍


ഇനി മുതല്‍ ഇരുള്‍ മറയാണു നിന്‍ ആകാശം

അതില്‍ പോല്‍ പറക്കുവാനില്ല പക്ഷങ്ങളും

മോഹങ്ങളൊക്കെയും ഹോമിച്ചു കളയുക

മോഹന വാഗ്‌‌ദാന ശീലുകള്‍ മറക്കുക...

2

കൂരിരുട്ടത്തൊരിടിമിന്നല്‍ പോലെ നീ

മരുക്കാട്ടിലെ മധുമലര്‍ മണമാണ്‌ നീ

അന്ധന്റെ കണ്ണ്‌ നീ

ബധിരന്റെ കാത്‌ നീ

ഇടയന്റെ ചൂരലും

പതിതന്റെ മോഹവും


പക്ഷീ നിനക്കെന്തു പറ്റി നിന്‍ പാട്ടെവിടേ

പക്ഷീ നിനക്കെന്തു പറ്റി നിന്‍ ചൂട്ടെവിടേ

പക്ഷീ നിനക്കെന്തു പറ്റി നിന്‍ ശീലവിടെ

പക്ഷം തളര്‍‌ന്നാലും ചിത്തം തകരാത്ത പൈങ്കിളീ

പാട്ടൊന്നു പാടിത്തരിക നീ

3

എന്റെ പാട്ടിന്നും മുഴങ്ങുന്നു ചുറ്റിലും

എരിയുന്നു കൂരിരുട്ടിലെന്റെ ചൂട്ടിന്നും

എന്റെ ശീലിന്നൊരു മാറ്റവുമില്ലിന്നും


പക്ഷം തളര്‍‌ന്നില്ല..

ചിത്തം തകര്‍‌ന്നില്ല..

പാടാന്‍ പിറന്നവള്‍

പാറാന്‍ പിറന്നവള്‍


എന്നെയടച്ചു പൂട്ടിയിരിക്കുന്നോര്‍

തന്നെയല്ലോ കൂരിരുട്ടത്തുലയുന്നു

എന്റെ  ചിറകരിഞ്ഞോരല്ലോ മാനത്ത്‌

ഉയരാന്‍ കഴിയാതെ മണ്ണില്‍ പതിക്കുന്നു


കെട്ടുക വരിയുക മൂടുക മണ്ണറയില്‍

കഴിയുമെങ്കില്‍ എന്റെ ചിന്താ ധാരയെ..

................

................

മഞ്ഞിയില്‍

01.04.1992

15 August 2020

രണ്ട്‌ ധാരകള്‍ .

പ്രക്ഷുബ്‌ധ സാഗരത്തില്‍
രുചി ഭേദങ്ങളുടെ *
രണ്ട്‌ ധാരകള്‍ ..

ഒന്ന്‌
കലര്‍പ്പില്ലാത്തത്‌
മറ്റേത്‌
ചവര്‍പ്പുള്ളത്‌.....,,,

അടിയൊഴുക്കുകള്‍ക്കും
അലയടികള്‍ക്കും
കീഴടക്കാനാകാത്ത
പ്രവാഹം ..

ആഴിയുടെ ആഴങ്ങളില്‍
രൌദ്ര ഭാവങ്ങളുടെ
വേഷപ്പകര്‍ച്ചയിലും
ശാന്തസുന്ദരമായൊഴുകുന്ന
ശുദ്ധമായ
തെളിനീര്‍ ധാര…

വിചിന്തനങ്ങളുടെ
വിഹായസ്സില്‍
വിഹരിക്കുന്നവര്‍ക്ക്
അനുഭൂതിദായകം ..

വിസ്‌മയങ്ങളുടെ
ആഴക്കയത്തില്‍
മുങ്ങിത്തുടിക്കുന്നവര്‍ക്ക്‌
നിലയില്ലാ കയം ...

**********
കലര്‍പ്പില്ലാത്ത ശുദ്ധജല പ്രവാഹത്തെക്കുറിച്ചുള്ള ഖുര്‍ആന്‍ പരാമര്‍ശം*
രണ്ടു സമുദ്രങ്ങളെ സംയോജിപ്പിച്ചതും അവനാണ്. ഒന്നില്‍ ശുദ്ധമായ തെളിനീരാണ്. രണ്ടാമത്തേതില്‍ ചവര്‍പ്പുള്ള ഉപ്പുവെള്ളവും. അവ രണ്ടിനുമിടയില്‍ അവനൊരു മറയുണ്ടാക്കിയിരിക്കുന്നു. ശക്തമായ തടസ്സവും.25:53-



25 March 2020

നീ വിളിച്ചു












വിശ്വാസിയുടെ ആകാശാരോഹണമത്രെ നമസ്‌കാരം.
ഒരു കവി ഭാവന....

******
നീ വിളിച്ചു
വിണ്ണിലേയ്‌ക്ക്‌
വിജയത്തിലേയ്‌ക്ക്‌
നിന്റെ സാമിപ്യം ഞാന്‍ കൊതിച്ചു
തീരം കൊതിക്കുന്ന തിരപോലെ
മധുമലര്‍ തേടുന്ന മധുപനെപ്പോലെ..

നെറ്റിത്തടം പതിഞ്ഞ
സുജൂദിന്റെ കലയിലൂടെ
പ്രയാണം തുടങ്ങി..

മദീന കണ്ടു
സീനാ പര്‍വ്വതം കണ്ടു
ഖുദ്‌സ്‌ കണ്ടു
ഏഴാകാശങ്ങളും പിന്നിട്ട്‌
സിദറത്തുല്‍ മുന്തഹയുടെ കവാടത്തില്‍
മുസ്വല്ല മുട്ട്‌ കുത്തി നിന്നു...
സിംഹാസനത്തിലേയ്‌ക്കുള്ള വഴി തേടി
മനസ്സ്‌ തുടികൊട്ടി!!

അനുരാഗത്തിന്റെ തീഷ്‌ണതയില്‍
‍ഞാനൊരു
നെയ്‌തിരിയായി!!

വെള്ളി വെളിച്ചത്തില്‍
മുങ്ങി നിവര്‍ന്ന സ്വര്‍ഗം
അവര്‍ണനീയമായ താഴ്‌വര
പ്രശാന്ത ഗോപുരം
പ്രകാശ നിര്‍‌ഝരി..

സംഗീതവും സുഗന്ധവും
പേറി വന്ന തെന്നലലകള്‍
പൂ പറിക്കുന്ന ചേലില്‍
‍ഈ തിരിനാളവും പറിച്ച്‌
പറന്ന്‌ പോയൊളിച്ചെങ്കിലാ
പ്രകാശ ഗംഗയിലെന്നാശിച്ച്‌
എല്ലാം മറന്ന്‌ എല്ലാം മറന്ന്‌
കാത്ത്‌ നിന്നേന്‍ ...

പ്രബോധനം പ്രസിദ്ധീകരിച്ചത്‌

29 February 2020

ഒറ്റമൂലി

തനിച്ചാകുമ്പോള്‍ ഒരു ജലകണം.
ഒരുമിച്ചൊഴുകുമ്പോള്‍ ഒരു നദിയാകും.
സം‌ഗമിക്കുമ്പോള്‍ മഹാ സാഗരമാകും.
തനിച്ചാകുമ്പോള്‍ ഒരു പരുത്തി നൂല്‍ മാത്രം.
ഇഴയടുപ്പിച്ച്‌ നൂല്‍‌ക്കപ്പെടുമ്പോള്‍
ഒരു പുതപ്പായി മാറുന്നു.
തനിച്ചാകുമ്പോള്‍
ഒരു പേജ്‌ മാത്രം.
ഒരുമിക്കുമ്പോള്‍
ഒരു പുസ്‌തകമാകുന്നു.
തനിച്ചാകുമ്പോള്‍ ഒരു ചോദ്യ രൂപം മാത്രം.
ഒരുമിക്കുമ്പോള്‍ ഉത്തരമായി മാറുന്നു.
തനിച്ചാകുമ്പോള്‍ ഒരു കല്ല്‌ മാത്രം.
ഒരുമിക്കുമ്പോള്‍ ഒരു കെട്ടിടമാകുന്നു.
തനിച്ചാകുമ്പോള്‍ ഒരു അര്‍‌ഥന മാത്രം.
ഒരുമിക്കുമ്പോള്‍ ഒരു സമര്‍‌പ്പണ സം‌ഗമമാകുന്നു.

സര്‍‌ഗാത്മകമാകട്ടെ വിഭാവനകള്‍..
ക്രിയാത്മകമാകട്ടെ പ്രവര്‍‌ത്തനങ്ങള്‍..
സമൂഹത്തിന്റെ  ഊര്‍ജോന്മുകമായ
ചിന്തകളെ പരിപോഷിപ്പിക്കാനും
നിര്‍‌ജീവതയ്‌ക്ക്‌ ജീവന്‍ പകരാനും,
ഉത്തമ ബോധ ബോധ്യങ്ങളുടെ
സം‌സ്ഥാപനത്തിനും,
അധമ ചിന്തകളുടെ നിഷ്‌കാസനത്തിനും

ഒരേ ഒരു ഒറ്റമൂലി !!!
നന്മയോട്‌ സഹകരിക്കുക...
തിന്മയോട്‌ വിയോജിക്കുക...
സം‌സ്‌കൃതമായ ഒരു സമൂഹത്തിന്റെ
പുനര്‍ നിര്‍‌മ്മിതി സഫലമായേക്കും.

മഞ്ഞിയില്‍.

14 February 2020

വിളവെടുപ്പ്‌

വിളവെടുപ്പ്‌
..........
വെറുപ്പും
വിദ്വേഷവും
വിതച്ച്‌ മുളപ്പിച്ച്‌
വളര്‍‌ത്തി
പടര്‍‌ത്തി
പന്തലിപ്പിച്ച്
മൊട്ടിട്ട്‌
പൂവിട്ട്‌
കായ്‌ച്ച്
ഇതാ
വിളവെടുപ്പ്‌ കാലമായി..
ഇനി
വിളയുടെ ദോഷം
പറയുന്നതിലെന്തര്‍‌ഥം ...?

......................

മണ്ണിന്റെ മക്കളിറങ്ങട്ടെ
കളകള്‍ പറിച്ചെറിയാനും
പാടം പാകപ്പെടുത്താനും
മണ്ണിനിണങ്ങിയ വിത്തൊരുക്കാനും
പുതിയ
കൃഷിയിറക്കാനും
നന്മയുടെ വിളവെടുപ്പിനും
.............
മഞ്ഞിയില്‍

08 September 2019

പൂക്കളം 

അത്തം മുതലെന്റെ മനസ്സിന്റെ മുറ്റത്ത്
ഒത്തിരിപ്പൂക്കളം തീര്‍ത്തു ഞാന്‍ ഭംഗിയില്‍
അതില്‍ ഞാന്‍ വരയ്‌ക്കാത്ത ചിത്രങ്ങളില്ലല്ലോ
അതില്‍ ഞാന്‍ നിരത്താത്ത മലരുകളുമില്ലാ...

നാട്ടുമുറ്റത്തുള്ള പൂക്കളം കാണുവാന്‍
ഓടി നടന്നു മടുത്തു മടങ്ങി ഞാന്‍
ഒന്നിനുമില്ലൊരു സൌരഭം സൌഭഗം
ഒന്നിലുമില്ലൊരു വര്‍ണ്ണ കൗതൂഹലം.

ചെമ്പരത്തികൊണ്ടു തീര്‍ത്ത ചില പൂക്കളം
ചമ്പകം മാത്രം നിരത്തിയ പൂക്കളം
മുക്കുറ്റികൊണ്ട്‌ നിറച്ച ചിലപൂക്കളം
മുല്ലപ്പൂ മാത്രമൊരുക്കിയ പൂക്കളം.

ഓരോ നിറത്തിനുമുണ്ടവകാശികള്‍
ഓരോമലരിനുപോലുമീ ദുര്‍ഗതി
മണ്ണിന്റെ ചാരുത പടരാത്ത മാനവ
മനസ്സിന്റെ മുറ്റത്തീ കവി തോറ്റുപോകുന്നു.

മുത്തശ്ശിക്കഥയിലെ പൂക്കളങ്ങള്‍ തേടി
മുറ്റത്തു പൈതങ്ങളോടി നടക്കുമ്പോള്‍
മനസ്സിന്റെ മുറ്റത്തീ കവിതീര്‍ത്ത പൂക്കളം
മുറ്റത്തൊരുക്കാന്‍ തുടികൊട്ടി മാനസം .
............................
റേഡിയോ ഏഷ്യ പ്രക്ഷേപണം ചെയ്‌തത്‌ ..

26 June 2019

ഖബറടക്കം ചെയ്യാനാകാത്ത ഓര്‍മ്മകള്‍

കരഞ്ഞ്‌ കലങ്ങിയ മാനം നോക്കി വരാന്തയിൽ  ഇരുന്നപ്പോൾ  ഓര്‍മ്മകളില്‍ ഒരിടി നാദം.ഒപ്പം കോരിച്ചൊരിയുന്ന പേമാരിയും.2003 അവസാന വാരത്തെ ഇരുള്‍ മുറ്റിയ പ്രഭാതവും അന്നേ ദിവസത്തെ കണ്ണീര്‍വാര്‍‌ത്ത സായാഹ്നവും മനസ്സില്‍ തെളിയുന്നു!!!

അബ്‌സ്വാർ  എന്ന പതിമൂന്നുകാരന്റെ മരിയ്ക്കാത്ത ഓർമ്മകൾ !!! വിട പറയാന്‍ നാഴികകള്‍ മാത്രം ബാക്കിയിരിക്കേ സ്‌ക്കൂള്‍ അസംബ്‌ളിയില്‍ തന്റെ ഊഴം അബ്‌സ്വാർ അവിസ്മരണീയമാക്കിയിരുന്നു!!!

അബ്‌സാറിന്റെ ഖബറിടത്തില്‍ നിന്നു കൊണ്ട്‌ പ്രതിഭയുടെ വാക്‌ധോരണിയുടെ ഈണവും  ആഴവും പരപ്പും ഒരു ചിത്രീകരണത്തിലെന്ന പോലെ ഓര്‍ത്തെടുക്കുകയാണ്.അതെ ഖബറടക്കം ചെയ്യാനാകാത്ത ഓര്‍മ്മകള്‍!!!
.................................

തുരുമ്പെടുത്ത ശ്‌മശാനവാതില്‍ മെല്ലെ തള്ളിത്തുറന്നു.
'നിങ്ങള്‍ക്ക്‌ സമാധാനം അടുത്ത നാളില്‍ എന്റെ ഊഴം'
കൊച്ചുപ്രായത്തില്‍ പഠിച്ച വാചകം ഉരുവിട്ടു.
വെണ്ണക്കല്‍ ഫലകത്തില്‍ അവന്റെ പൂര്‍ണ്ണ നാമം
അഥവ പേരിന്റെ വാല്‍‌ കഷ്‌ണമായി എന്റെ പേരും

കണ്ണുകള്‍ തറച്ചു നിന്നത് അവിടെയാണ്‌.
ഞാനാണോ ഈ കല്ലറക്കകത്ത്‌
ശരീരത്തില്‍ മണ്ണുരയുന്നു
കൈകാലുകളില്‍ പുഴുക്കളിഴയുന്നു
കണ്ണുകള്‍ തുറക്കാനാകുന്നില്ല
ചുണ്ടുകള്‍ ചലിക്കുന്നില്ല

ബാപ്പാ...
കൊച്ചുമോന്‍ കുലുക്കി വിളിച്ചു
ഉറക്കില്‍ നിന്നെന്നവണ്ണം
ഞെട്ടിയുണര്‍ന്നു
ജീവനൊടുങ്ങും മുമ്പെ
ഖബറടക്കം ചെയ്യപ്പെട്ടവന്‍
ഞാന്‍
അതെ
ദേഹം മണ്ണോട്‌ ചേരുന്നതും
ദേഹി വിണ്ണിലേക്കുയരുന്നതും
രുചിച്ചു
ആസ്വദിച്ചു.
അങ്ങകലെ ഏഴാനാകാശത്തിനുമപ്പുറം
ഫിര്‍ദൌസെന്ന പൂങ്കാവനത്തില്‍
എത്തിനോക്കി
മനസ്സില്‍ താലോലിച്ചിരുന്ന
സ്വര്‍ഗലോകത്ത്‌ മാലാഖമാരോടൊത്ത്‌
ഉല്ലസിക്കുകയാണാ ദാര്‍ശനികന്‍ (അബ്‌സാര്‍ )

എന്നെ കളീകൂട്ടൂലലേ...?
പിണക്കം പറഞ്ഞ്‌ തിരിച്ച്‌ പോന്നു
ഇന്ന്‌ ഞാന്‍
ആ സ്വപ്‌നലോകത്താണ്‌.
സഹപാഠികളേയും അധ്യാപകരേയും
സാക്ഷി നിര്‍ത്തി
അവസാന പ്രഭാതത്തില്‍
നീ ആണയിട്ട വാക്കുകളുടെ
പടഹധ്വനിയും
പ്രതിധ്വനിയും
എന്റെ ഉറക്കം കെടുത്തുന്നു.
.....
ഉത്തര ധ്രുവത്തിലുള്ളവന്റെ വേദന
ദക്ഷിണ ധ്രുവത്തിലുള്ളവന്‌
അനുഭവേദ്യമാകുന്ന നാള്‍ വിദൂരമല്ല
നാം മനുഷ്യര്‍ ഒരേ മാതാപിതാക്കളുടെ
മക്കളാണെന്ന ബോധം
ബോധ്യമാക്കിയെങ്കില്‍

ഇതായിരുന്നുവല്ലൊ
നിന്റെ ഭാഷണത്തിന്റെ സത്ത..
പേരിന്റെ പൊരുളറിഞ്ഞ കുട്ടീ..

നിന്റെ സ്വപ്‌നം പൂവണിയാന്‍
ധ്രുവങ്ങളോളം ദൂരം ഇനിയും
താണ്ടേണ്ടി വരും.
നിന്റെ വേപഥു തിരിച്ചറിയുന്ന 
ഒരു പച്ചമനുഷ്യനെ കാണാന്‍
ഭൂതക്കണ്ണട വേണ്ടി വരും.
....
രക്തബന്ധങ്ങള്‍ തിരിച്ചറിയപ്പെടാത്തകാലം
കഴുകനും മാടപ്രാവിനും 
ഒരേ ശിശ്രൂഷ ലഭ്യമാകുന്ന കാലം
ഈ ഭൂമികയില്‍ നിന്നുകൊണ്ടും
പ്രതീക്ഷയുടെ
സ്വപ്‌നങ്ങള്‍ നെയ്‌തെടുത്തവന്‍ നീ
....
ഒരുതുള്ളി വെള്ളത്തിന്‌ വേണ്ടി 
തൊണ്ടകീറുന്ന പൈതങ്ങളുടെ
കാതടപ്പിച്ച്‌കൊണ്ട്‌
ഗുഡ്‌സ്‌ വണ്ടികള്‍ ചൂളം വിളിച്ച്‌ പായുന്നു
നിറയെ പാലും പഴവും വഹിച്ച്‌ കൊണ്ട്‌
ഇതു്‌ ദൈവങ്ങള്‍ക്കുള്ളതാണ്‌.
....
വിശുദ്ധ വചനങ്ങളില്‍
പരലോക വിചാരണയുടെ വാങ്‌മയ ചിത്രം:
നീയെന്നെ ഊട്ടിയില്ല
കുടിപ്പിച്ചില്ല
ഉടുപ്പിച്ചില്ല
സന്ദര്‍ശിച്ചില്ല...

'സര്‍വ്വലോക പരിപാലകന്‍
നീയെത്ര പരിശുദ്ധന്‍
അടിയനെങ്ങനെ നിന്നെ ശിശ്രൂഷിക്കാന്‍..'

'സഹജീവികളെ സേവിച്ചിരുരുന്നെങ്കില്‍ .
അതത്രെ ദൈവസേവ.'
....

ശുദ്ധപാഠങ്ങളോതി
അധരവ്യായാമം ചെയ്‌ത് 
സംതൃപ്‌തിയടയുന്ന
ലോകത്തോട്‌

'നീ നിന്നെയറിഞ്ഞുവെങ്കില്‍ ദൈവത്തെ അറിഞ്ഞേനെ
സംസ്‌കൃത ചിത്തനായ്‌ തീര്‍ന്നേനേ..'
ചങ്കു പൊട്ടുമാറുച്ചത്തില്‍
കൂകിപ്പാടിയ പൂങ്കുയിലേ
ഈ പാട്ടിന്റെ പ്രതിധ്വനി
എന്റെ ഉറക്കം കെടുത്തുന്നു.

*************************



അബ്‌സാറിന്റെ ഖബറിടം സന്ദര്‍ശിച്ചപ്പോള്‍ മനസ്സില്‍ മിന്നിമറഞ്ഞ ചില വിചാര വികാരങ്ങള്‍.പിറന്നത്‌ 1990 ജനുവരി 5,മറഞ്ഞത്‌ 2003 ജൂണ്‍ 26 .